Dees tekst sjting in ut booklet van de CeeDee `t is ein komme en gaon:

Eine gans toepasselikke titel veur de nuuj CD van de PK, de Prinse Kepel van d`n Uul oet Remunj. Ein meziekgezelsjap kump en geit... de muzikante marsjeere in en oet... de leiders wissele zich aaf... de mezieksjtukke gaon mit de tied mit, zeen de tied soms wied veuroet of veure os truk in de tied... kortom `t is ein komme en gaon, onger ut motto hojje woh.
Dae kump is van herte welkom, dae wilt goan maak gein kwaoj gezichte... vriejheid bliejheid... maar dae mitduit, duit det mit heel zien hert en longe.

Zo waas ut in 1946 toen Jos Meisters: De sjtaole mit muzikante van `t Ketoene Dorp, de eerste nao-oorlogse prins van d`n Uul: Rein 1 (Rein Pijls) ging vergezelle. Prins Rein had de legendarische sjpreuk: veer laeve nog, waem duit os get, en det kan de Prinse Kepel hem nao 53 jaor (noe dus inmiddels 57 jaor) nog altied naozegke.

Begin jaore fieftig vorme Jacq en Jean de Bock mit muzikante van de keuninklikke harmeniej ein kepel, die mit Prins Wim 1 (W. Crijns), Prins Twan 1 (A. van Bergen) en Miel 1 (E. Gabriels) rondjtrokke.
Ein paar jaor waas d`r ouch ein neet-harmeniej-gebonje prinsekepel, maar Sjra Puts senior zorgde in 1961 weer veur ein kepel oet de keuninklikke harmeniej diej toet 1969, `t jaor van sjnee Prins Huub van Ool veur de vastelaovend in Remunj bleef wirke... want `t waas en is wirke geblaoze, om mit gevaor veur tenj en lippe ein kefee binne te marsjeere, op eine kaaje wage te blaoze of eine werme zaal te laote hosse.

Theo van de Heuvel begreep det; blaoze maakt dorstig en hongerig. Hae zorgde veur de cente, insjtrumente, pekskes en heutjes en Henk en Bep Bothmer van Nationaal zorgde det de jonges mit die daag get te aete krege. Jos Meisters waas in die jaore de muzikale veurman...

In 1976 pak Thei Hamers `t management van de Prinse Kepel ter handj. Es prins Thei 3 hat hae in 1974 ervare wie belangriek ein prinsekepel veur `t vastelaovessjpeel is.
Hae maak van de kepel eine moderne band mit eine sound dae toet wied boete Remunj gewaardeerd waerd. Thei Hamers zorg veur alle neet-muzikale zake zodet de jonges en maedjes zich bezig kinne haaje mit heur instrumente, mit note en neutjes en veural mit vrundjsjap, alles onger de muzikale leijing van Math Pollaert.

In 1987 maak de kepel ein bendje mit es letste nummer: veer zeen de beste muzikante. Op dees CD kint geer heure det det nog altied zo is. Ze wille mit name Thei Hamers danke veur al zien werk en ouch alle muzikante en mitwirkers diej in al die jaore zeen gekomme en gegaon...

De leden vanne Prinse Kepel
De PK besjteit oet 19 persone, wovan 14 manskaerels en 5 vrouwluuj. 

Geer kint meer laeze euver de vaste bezetting op de volgende paginaas. Dao waere de miense per sectie veurgesjteld.